Ağstafa rayonu Vurğun qəsəbə tam orta məktəbin idman zalında Ağstafa rayon Polis şöbəsinin əməkdaşları arasında, silahsız özünü müdafiə və əlbəyaxa döyüş üzrə yarış keçirilib.

Rekord.az xəbər verir ki, yarışın açılış mərasimində Azərbaycan Respublikasının Dövlət himni səsləndirilib.

Ümummilli Lider Heydər Əliyevin, Azərbaycan Respublikasının müstəqilliyi və ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib. Azərbaycan Respublikasının Prezidenti cənab İlham Əliyevin 2024-cü ilin idman yekunlarına həsr olunmuş tədbirdəki nitqi səsləndirilib. Açılış mərasimində Ağstafa rayon Polis Şöbəsinin rəisi, Polis polkovniki Vüqar  Xəlilov, DİN-nin idman cəmiyyətinin inspektoru, Polis leytenantı Hüseyn Alıyev, Qazax-Tovuz Regional Gənclər və İdman İdarəsinin rəisi Əziz Məsmalıyev çıxış edərək yarışın keçirilməsinin əhəmiyyətindən danışaraq, iştirakçılara uğurlar arzulayıblar. Gərgin mübarizə şəraitində keçən yarışda yüksək nəticə əldə etmiş polis əməkdaşları diplom və medallarla təltif olunublar. Yarışda 62 nəfər polis mübarizəyə qatılıb.