Azərbaycan Milli Antidopinq Agentliyi (AMADA) 23 dekabr 2021-ci il tarixində 2021-ci ilin  nəticələrəninə həsr olunmuş mətbuat  konfransı keçirib. Tədbirdə AMADA-nın direktoru Şəfəq Hüseynli bildirib ki,  bu gün AMADA-nın yaradılmasının 5 ili tamam olur. 2016-cı ildə prezident İlham Əliyevin  fərmanı ilə  AMADA-nın yaradılması Azərbaycanın təmiz idman dəyərlərinə verdiyi əhəmiyyətin təzahürüdür. AMADA 5 ilik fəaliyyəti barədə məlumat verən Ş. Hüseynli bildirib ki, Ölkədə effektiv və dayanıqlı dopinq nəzarətini təmin etmək üçün AMADA fəaliyyətini daim təkmilləşdirir, müasir çağırışlar və meyllərə uyğunlaşdırır, habelə ən qabaqcıl təcrübələri və müasir innovativ üsulları tətbiq edir.  AMADA təmiz idman dəyərlərinin qorunması üçün həm milli, həm də beynəlxalq səviyyədə tədbirlər görür qlobal antidopinq  prosesinə öz töhfələrini verir.  5 illik fəaliyyəti dövründə AMADA ölkədə effektiv dopinq nəzarətini həyata keçirməklə yanaşı qlobal səviyyədə  dopinqlə mübarizədə etibarlı tərəfdaş kimi nüfuz qazanıb. 
Ş. Hüseynli  5 illik fəaliyyəti əks etdirən bir sıra statistik rəqəmləri də açıqlayıb. Son 5 ildə  AMADA tərəfindən 6260 dopinq testi həyata keçirilib.  Bunlardan 5400-ü  milli test proqramı 860-ı isə beynəlxalq sifarişlər əsasında olub. AMADA-nın fəaliyyətə başladığı dövrdən indiyədək ümumilikdə  76 antidopinq qayda pozuntusu üzrə qərar qəbul edilib və müvafiq sanksiya tətbiq edilib. Bununla yanaşı, 9 idmançının işi üzrə xitam yəni bəraət qərarı verilib.  AMADA-nın direktoru  bildirib ki, statistik rəqəmlərin illər üzrə müqayisəsi də antidopinq sahəsindəki inkişafı əyani olaraq göstərir. AMADA-nın fəaliyyətə başlamasından sonra Azərbaycanda antidopinq qayda pozuntularının sayında əhəmiyyətli dərəcədə azalma müşahidə olunur. 
AMADA-nın test proqramı icra etməyə başladığı 2017-ci ildə  aşkarlanan antidopinq qayda pozuntularının  götürülən testlərin nisbəti 4.5 faiz idisə, 2018-ci ildə bu nisbət 2,5 faiz, 2019 cu ildə 1,3 faiz, 2020-ci ildə 0.5 faiz, 2021-ci ilin indiyədək olan dövründə isə 0.2 faiz təşkil edib.
Beynəlxalq səviyyədə aşkarlanan antidopinq qayda pozuntularının sayında da nəzərə çarpan azalma müşahidə olunur. AMADA-dan əvvəl 2013-2016 ci illər ərzində beynəlxlq səviyyədə 40 antidopinq qayda pozuntusu aşkarlanmışdısa  son  5 ildə bu rəqəm 21-ə bərabər olub. Son üç ildə isə ildə beynəlxalq səviyyədə Azərbaycan idmançılarında cəmi iki antidopinq qayda pozuntusu aşkarlanıb. Bu da onu göstərir ki, antidopinq qayda pozuntuları törədən idmançılar əksəriyyəti elə ölkə daxilində müəyyən edilir və onların beynəlxalq yarışlarda iştirakının qarşısı alınır. 
Ş. Hüseynli cari ildə görülən işlərdən də danışıb və bir sıra statistik rəqəmləri açıqlayıb. 2021-ci il ərzində idmançılardan ümumilikdə 1588  test nümunəsi götürülüb. Bunlardan 1456-ı milli test proqramı çərçivəsində,  132- i isə beynəlxalq sifariş əsasında olub.
2021-ci il üzrə 19  Antidopinq Qayda Pozuntusu  üzrə araşdırma aparılıb.  Onlardan  13-ü bu il icraata götürülmüş və 6 -ı isə ötən ildən başlanan icraatlardır. 19 icraatdan artıq 9-u üzrə qərar qəbul olunub. Bir işə isə xitam verilib. 18 antidpoinq qayda pozuntusu ümumilikdə  11 idman növündə qeydə alınıb. (paurliftinq 5, güləş 2, Velosiped idmanı 2, Basketbol 2, Para-atletika 1, futbol (işə xitam verilib), sambo, karate, Boks, Cüdo və  Para-cüdo idman növlərinin hər birində 1)
AMADA öz fəaliyyətində antdopnq maarifləndirməsinə də geniş yer verib. İl ərzində maarifləndirmə ilə bağlı 29 seminar 20 vebinar və  8 təbliğat tədbiri  və 4 ümumi tədbir keçirilib. 
Beynəlxalq səviyyədə görülən işlərdən və əldə olunan uğurlardan da danışan Ş. Hüseynli bildirib ki,  AMADA təmiz idmanın təşviqi məqsədilə beynəlxalq arenada fəal iştirak edir. AMADA Azərbaycanın Nümayəndə heyəti qismində Avropa Şurasının Antidopinq Konvensiyasının Monitorinq Qrupunda (T-DO), Avropa Şurasının Ümumdünya Antidopinq Agentliyi üzrə Xüsusi Avropa Komitəsi (CAHAMA) və YUNESKO-nun Tərəflərin Konfransında ölkəmizi təmsil edir. AMADA-nın təşəbbüsü ilə Avropa Şurası çərçivəsində bir sıra layihələr icra olunur. AMADA-nın beynəlxalq səviyyədə həyata keçirdiyi layihələrdən biri Antidopinq icraatı zamanı idmançıların hüquqlarının təminatı ilə bağlı layihəsi uğurla icra edilir. Digər beynəlxalq layihə  Antidopinq sahəsində gender bərabərliyinin gücləndirilməsi layihəsinin icrası da davam edir. Layihənin həyata keçirilməsinə dəstək məqsədi ilə  Avropa Şurası Gender Bərabərliyi üzrə Xüsusi Komitə  təsisi edib. 
Ş. Hüseynli deyib ki, bu il AMADA üçün beynəlxalq səviyyədə uğurlardan biri də  Pekin 2022 Qış Paralimpiya Oyunlarında Antidopinq Proqramı üzrə ÜADA-nın Müstəqil Müşahidəçi Qrupuna rəhbərliyin ilk dəfə Azərbaycan nümayəndəsinə həvalə edilməsidir. 
Mətbuat konfransında  AMADA-nın beynəlxalq və yerli səviyyədə əməkdaşlıqları , həyata keçirilən layihələr, ictimai və sosial məsuliyyət tədbirləri haqqında  ətraflı  məlumat verilib. Sonda isə mətbuat nümayəndələrinin sualları cavablandırılıb.