Azərbaycanın qadın və kişilərdən ibarət yığma komandalarının baş məşqçiləri bəlli olub. "Rekord.az" xəbər verir ki, komandalarımızı qarşıdakı yarışlarda meydana çıxaracaq mütəxəssislərin adlarına Azərbaycan Voleybol Federasiyasında (AVF) keçirilmiş İdarə Heyətinin geniş iclasında aydınlıq gəlib.

Qurumun prezidenti Cavid Qurbanovun rəhbərliyi ilə təşkil olunmuş yığıncaqda qadın və kişilərdən ibarət milli yığma komandalara baş məşqçilərin təyininatı rəsmiləşib. İdarə Heyətinin qərarı ilə Eldar Yusubov qadınlardan ibarət milli komandaya, Pərviz Səmədov isə kişilərdən ibarət milliyə baş məşqçilər təyin olunublar.

İclasda 2021/22 mövsümündə Super Liqa, Yüksək Liqa, l liqalarının və ölkə kubokunun yekunu müzakirə olunub. Bunlarla yanaşı, qarşıda duran vəzifələr, voleybolun inkişafı, milli komandaların çıxış edəcəyi Avropa çempionatının təsnifat mərhələləri, V İslam Həmrəyliyi Oyunlarına komandaların hazırlığı haqqında fikir mübadiləsi aparılıb. 

Cavid Qurbanov bildirib ki, Azərbaycanda bütün sahələrdə olduğu kimi, idmana da göstərilən dövlət qayğısı sayəsində ölkə idmanı intibah dövrünü yaşayır. Milli komandamızın 9 dəfə Avropa çempionatının final mərhələsində, 4 dəfə dünya çempionatında iştirak etdiyini, klublarımızın Avropa kuboklarındakı uğurlu çıxışlarını xatırladan federasiya prezidenti qarşıya əsas hədəf kimi iştirak ediləcək yarışlarda  yüksək nəticə əldə etmək tapşırığı qoyub.

Pandemiyadan sonra bəzi çətinliklərin olmasına baxmayaraq Azərbaycan çempionatının keçirildiyini də qeyd edən Qurbanov bildirib ki, çempionatda iştirak edən oyunçuların demək olar ki, əksəriyyəti gənclər olması sevindirici haldır. O, bildirib ki,  paytaxtımızda eləcə də bölgələrdə olan ucaboylu qız və oğlanları voleybola cəlb etmək lazımdır. Buna görədə yanız paytaxtda deyil, rayonlarda məşq edən gənclərlə işləmək lazımdır. Federasiya prezidenti bununla bağlı görüşdə iştirak edən məşqçilərə də tövsiyyələrini verib.

C.Qurbanov bu gün start götürəcək Avropa çempionatının seçmə oyunlarında mübarizə aparacaq 22 yaşadək oğlan voleybolçularımıza uğurlar arzulayıb.

Daha sonra yeni təyin olunan baş məşqçilər ilk öncə onlara göstərilən böyük etimada görə AVF rəhbərliyinə təşəkkür edib, milli komandalarımızın qarşıdakı yarışlarda  uğurlu çıxışı üçün vacib amillərdən danışıb, təkliflərini veriblər.

Qurbanov məşçiləri dinlədikdən sonra bildirib ki, əsas hədəf qarşıdakı yarışlarda uğurlu çıxış etmək və ölkəmizdə voleybolun yenidən inkişafına nail olmaqdır.

Regionlarda voleybolun inkişaf yolları, həmçinin klublarla iş birliyi barədə də müzakirələr aparılıb, İdarə Heyətinə lazımı tapşırıqlar verilib.