“Şəhriyar Məmmədyarovla ilk oyun çətin keçdi. Sonrakı oyunda az qalsın məğlub olacaqdım. Amma daha sonra macarıstanlı şahmatçı Riçard Rapporta armaqeddonda qalib gəldim. Belə bir nüfuzlu yarışın qalibi olduğuma görə çox sevinirəm”.

Rekord.az xəər verir ki, bu sözləri “Vüqar Həşimov Memorialı-2021”in mətbuat xidmətinə müsahibəsində turnirin qalibi ABŞ təmsilçisi Fabiano Karuana  deyib.

Vüqar Həşimovun xatirəsinə həsr olunan super turnirin bundan sonra da təşkil olunmasının əhəmiyyətini qeyd edən şahmatçı deyib: “Vüqar Həşimovun xatirəsinə həsr olunan super turnir ötən il pandemiya ilə əlaqədar keçirilmədi. Sevinirik ki, bu nüfuzlu yarış bu il təşkil edilib və bundan sonra hər il təşkil olunacaq. Blits və rapid üzrə oyunlar bir qədər çətin olsa da, maraqlı və gərgin rəqabət şəraitində keçdi. Belə bir yarışda iştirakdan məmnunam”.

Qeyd edək ki, Vüqar Həşimov memorialı ilk dəfə 2014-cü ildə Şəmkirdə keçirilib. Hazırkı dünya çempionu Maqnus Karlsen dörd (2014, 2015, 2018, 2019), Azərbaycan şahmatçısı Şəhriyar Məmmədyarov isə iki (2016, 2017) dəfə turnirin qalibi olublar.