Avropa Voleybol Konfederasiyası (CEV) və Azərbaycan Voleybol Federasiyası qadın voleybolçular arasında növbəti Avropa çempionatının  (CEV EuroVolley Women) ölkəmizdə keçiriləcəyini təsdiqləyib. "Rekord.az" xəbər verir ki, hər iki qurum bununla bağlı birgə açıqlama yayıb. Rəsmi açıqlamanı təqdim edirik:

"Ölkəmiz Gürcüstanla birgə keçirdiyi AVRO-2017-dən doqquz il sonra yenidən bu hüquqa sahib çıxıb. Azərbaycan dörd qrupdan birinə ev sahibliyi edəcək. Qarşılaşmalar 2017-ci ildə olduğu kimi yenə Milli Gimnastika Arenasında təşkil olunacaq. Serbiyanın çempion olduğu həmin yarışda Azərbaycan Avropanın ən güclü dörd komandasından biri olub.
2026-cı il yayın sonuna planlaşdırılan turnirdə ümumilikdə Avropanın 24 ən yaxşı komandası iştirak edəcək. Bu komandalardan altısı məhz Bakıda mübarizə aparacaq. Azərbaycanla yanaşı, Çexiya və İsveçin AVRO-2026-ya birgə ev sahibliyi edəcəyi artıq təsdiqlənib".

Həmçinin CEV prezidenti Aleksandar Boriçiç AVRO-2026-nın yenidən ölkəmizdə keçirilməsini şərh edib: “Biz əminik ki, Avropa çempionatı Azərbaycan yığmasının hazırkı üzvləri, eləcə də gənclər üçün böyük stimul olacaq, gələcək nəsil azərbaycanlı oyunçuları ruhlandıracaq. Biz onlarla işləməyi səbirsizliklə gözləyirik. Əminik ki, Azərbaycan Voleybol Federasiyası yarışın yenə yüksək səviyyədə təşkili üçün əlindən gələni edəcək”.