Futbolçuların sənədlərini kütləvi şəkildə saxtalaşdırmaq əsası ilə 1 il müddətinə futboldan kənarlaşdırılan “Marafon” İdman Klubunun, həmçinin Ağcabədinin “Olimpiya” komandasının rəsmisi Orxan Əliyevin şikayəti qismən təmin edilib.

Rekord.az xəbər verir ki, bu barədə AFFA-nın Apellyasiya Arbitraj Tribunalının qərarında bildirilib.

Tribunalın qərarına əsasən, “Marafon”un rəsmisi, eyni zamanda futbolçusu olan O.Əliyevin cəzası 1 ildən 6 aya endirilib. Qalan 6 ay şərti cəza kimi tətbiq olunub. Şərti cəzanın çəkilməsi üçün 3 ay sınaq müddəti müəyyən edilib. Sınaq müddətinin başlanğıcı 2025-ci il martın 22-dən hesablanıb.

Apellyasiya şikayətləri qalan hissədə təmin edilməyib. Həmçinin qərardan Lozannadakı (İsveçrə) İdman Arbitraj Məhkəməsinə (CAS) şikayət verilməsinin mümkünlüyü maraqlı tərəflərə izah olunub.

Danışılmış oyunlarda iştirak etmiş "Mingəçevir"in sabiq futbolçusu Muxtar Nəzərlinin apellyasiya şikayətinə baxılması isə təxirə salınıb.

Bildirilib ki, oyunçu tərəfindən verilən apellyasiya şikayətinə baxılması Azərbaycan Respublikasının Baş Prokurorluğuna sorğu göndərilməsi ilə əlaqədar olaraq təxirə salınıb.

Qeyd edək ki, AFFA İntizam Komitəsi yanvarın 30-da Muxtar Nəzərlini futbol ilə əlaqədar hər hansı fəaliyyətlə məşğul olmaq hüququndan ömürlük məhrum edib.