Türkiyənin Konya şəhərində keçirilən 5-ci İslam Həmrəyliyi Oyunlarında avqustun 7-də  Azərbaycan velosipedçiləri növbəti yarışlarda iştirak ediblər.

Rekord.az xəbər verir ki, Elit/U23 yığma komandamızın üzvləri Konya Velodromunda baş tutan trek velosipedinin xallar üzrə qrup ötüşməsi növündə mübarizə aparıblar.

Qadınlar arasında yarışda Viktoriya Sidorenko və Ayan Xankişiyeva, kişilər arasında yarışda isə Musa Mikayılzadə və Nəcəf Bağırov güclərini sınayıblar.

Perspektivli velosipedçimiz Ayan Xankişiyeva əzmkar mübarizə apararaq 13 xalla 4-cü yerə layiq görülüb. Digər idmançımız Musa Mikayılzadə 8 xalla 7-ci yerə çıxıb.

Digər idmançılarımız Viktoriya Sidorenko və Nəcəf Bağırovdan uğurlu nəticələr gözlənilsə də, onlar ümidləri doğrultmayıb və imkanlarından tam istifadə edə bilməyərək mübarizəni tamamlamayıblar.

İslam Həmrəyliyi Oyunlarında baş məşqçilər Asif Həsənov (şose üzrə) və Elçin Qərəmanovun (trek üzrə) rəhbərliyi ilə kişi velosipedçilərdən Elçin Əsədov, Nəcəf Bağırov, Əmral Abduləzizli, Əli Qurbanov, Musa Mikayılzadə, Şahin Eyvazov, Elgün Əlizadə, qadın velosipedçilərdən isə Viktoriya Sidorenko, Ayan Xankişiyeva və Lalə Əbdürəhmanova iştirak edirlər.

İdmançılarımız həm trek, həm də şose növlərində yarışırlar.
56 ölkədən 4200 idmançının qatıldığı İslam Həmrəyliyi Oyunlarının rəsmi açılış mərasimi avqustun 9-da, bağlanış mərasimi isə avqustun 18-də baş tutacaq.