Qadın voleybolçular arasında Çempionlar Liqasında növbəti oyunlar baş tutub. "Rekord.az" xəbər verir ki, Azərbaycan millisinin üzvü Ayşən Abduləzimovanın formasını geyindiyi Macarıstanın "Vasas" klubu növbəti oyununu keçirib. 

A qrupunda yer alan komanda Polşanın "Developres" kollektivinin qonağı olub. Səfər qarşılaşması blokçumuzun komandası üçün uğursuz alınıb. Güclü rəqibdən yalnız bir set ala bilən "Vasas" evə xalsız dönmək məcburiyyətində qalıb. 

Macarıstan təmsilçisinin növbəti məğlubiyyətini aldığı görüşdə yığmamızın və "Vasas"ın kapitanı 7 xal qazanıb. Abduləzimova meydan sahiblərini 6 dəfə hücumda, 1 dəfə isə blokda məyus edib.

Qeyd edək ki, "Vasas" növbəti oyununu yanvarın 31-də evdə keçirəcək. Həmin gün voleybolçumuzun komandası qrup lideri və yarışın favoritlərindən olan İtaliyanın "Conegliano" kollektivini qəbul edəcək.