Avropa çempionatının ilkin təsnifat mərhələsində iştirak edən və yer aldığı B qrupunun qalibi olan 19 yaşadək futzalçılardan ibarət Azərbaycan millisinin üzvləri ilə görüş keçirilib.

Rekord.az xəbər verir ki, Azərbaycan – Yunanıstan oyununda əvvəl Azərbaycan Futzal Federasiyasının vitse-prezidenti Elşən Abasov komanda üzvlərini qazanılan uğur münasibəti ilə federasiya rəhbərliyi adından təbrik edib, əsas mərhələdə də inamlı çıxış etməyin vacibliyini bildirib, bunun üçün komandaya lazımi şəraitin yaradılacağını vurğulayıb.

Sonda U-19-un üzvlərinə diplomlar təqdim olunub və xatirə şəkilləri çəkdirilib.

Qeyd edək ki, U-19 Avropa çempionatının əsas mərhələsində Bosniya və Herseqovina, Xorvatiya və Türkiyə yığmaları ilə qarşılaşacaq. Oyunlar 25-30 mart tarixlərində Xorvatiyada təşkil olunacaq.