Bu gün Azərbaycan Basketbol Liqasında 11-ci turun iki oyunu baş tutub. 

Rekord.az xəbər verir ki, "Sərhədçi" İdman Mərkəzində keçirilmiş turun açılış oyununda "Sərhədçi" və "Şəki" üz-üzə gəliblər.

Bu görüşdə "Sərhədçi" 112:82 hesablı rahat qələbə qazanıb. Ən məhsuldar basketbolçular "Sərhədçi"də Kaleb Hanter (30 xal, 7 asist), "Şəki"də Pol Dibal (21 xal, 9 ribaund) olublar.

Günün ikinci oyununda liderlər qrupunda qərarlaşmış "Neftçi" "Cəlilabad" klubu ilə qarşılaşıb. Gərgin oyunun yekununda 72:63 hesabı ilə sevinən tərəf "Neftçi" olub. Ən məhsuldar basketbolçular  "Neftçi”də Toraje Breyk (20 xal, 11 asist), "Cəlilabad"da Rişan Conson (15 xal, 10 ribaund) olublar.