8 Noyabr - Zəfər Günü münasibətilə Siyəzən şəhər stadionunda "Zəfər kuboku" futbol turniri keçirilib.

Rekord.az xəbər verir ki, yarışda rayon ümumtəhsil məktəblərinin 11 komandası mübarizə aparıb.

Yarış 8 Noyabr - Zəfər Gününün qeyd olunması, yeniyetmələrin vətənpərvərlik ruhunda tərbiyə olunması, futbol idman növünə yeniyetmələrin marağının artırılması, bu idman növünün Siyəzən rayonunda inkişaf etdirilməsi, yeniyetmələrin fiziki sağlamlıqlarının qorunması və möhkəmləndirilməsi, eləcə də asudə vaxtın səmərəli təşkil edilməsi məqsədi daşıyıb.

5 gün davam edən yarışın nəticəsinə əsasən Siyəzən şəhər 2 nömrəli tam orta məktəbin komandası I yeri tutaraq birinciliyin qalibi olub. Siyəzən şəhər 4 nömrəli tam orta məktəb və Yenikənd kənd tam orta məktəblərin komandaları müvafiq olaraq II və III yerləri tutublar.

Yer tutan komandalar Quba-Xaçmaz Regional Gənclər və İdman İdarəsinin müvafiq dərəcəli diplomları ilə təltif ediliblər.