8 Noyabr – Zəfər gününə həsr olunmuş 2007-2008-ci və 2009-2010-cu il təvəllüdlü oğlanlar arasında kross qaçışı üzrə Siyəzən rayon birinciliyi keçirilib.

Rekord.az xəbər verir ki, Quba-Xaçmaz Regional Gənclər və İdman İdarəsinin Siyəzən rayonu üzrə gənclər və idman sektorunun təşkilatçılığı Siyəzən şəhər stadionunda keçirilən yarışda təsdiq edilmiş əsasnaməyə uyğun olaraq 2007-2008-ci il təvəllüdlü yeniyetmələr 2000 metr, 2009-2010-cu il təvəllüdlü yeniyetmələr isə 1000 metr məsafədə qüvvələrini sınayıblar.

Yeniyetmələrin vətənpərvərlik və vətəndaşlıq ruhunda tərbiyə olunması, Vətən müharibəsi şəhidlərinin xatirəsinin yad edilməsi, idman yarışlarının kütləviliyinin artırılması, eləcə də respublika səviyyəli yarışlarda iştirak etmək üçün perspektivli idmançıların aşkara çıxarılması məqsədi ilə keçirilən yarışda 45 oğlan yeniyetmə iştirak edib.

Yarışların nəticəsinə əsasən 2007-2008-ci il təvəllüdlü yeniyetmə oğlanlar arasında Zeynalov Mətin I, Mayılov Toğrul II, Mahmudlu Rəşid III, 2009-2010-cu il təvəllüdlü yeniyetmə oğlanlar arasında isə Səfərli Xəzər I, Nuriyev Abdullah II, Mayılov Cavanşir III tutublar.

Mükafatlandırma mərasimində yer tutan yeniyetmə idmançılar Quba-Xaçmaz Regional Gənclər və İdman İdarəsinin medal və diplomları ilə təltif ediliblər.