Türkiyədə qadın voleybolçuların birinciliyində növbəti oyunlar baş tutub. "Rekord.az" xəbər verir ki, Azərbaycan millisinin üzvü Ayşən Abduləzimovanın formasını geyindiyi "Sarıyer BLD" əvvəlki turlardan təxirə salınmış görüşə çıxıb. 

Blokçumuzun komandası 19-cu turun qarşılaşması çərçivəsində "Əczaçıbaşı" ilə üz-üzə gəlib. Oyun kifayət qədər gərgin keçib. Səfərdə keçirilən görüşə yaxşı başlayan "Sarıyer BLD" ilk seti aktivinə yazdırıb. Bundan sonra üstünlüyə yiyələnən meydan sahibləri ardıcıl iki hissədə qalibgəlməklə 2:1 hesaı ilə önə keçiblər. Lakin asan təslim olmayan Ayşən və rəfiqələri növbəti seti qalib başa vurmaqla ümumi hesabı bərabərləşdiriblər və oyunun taleyini tay-brekə daşıyıblar. Həlledici hissədə isə sahibi komanda daha dəqiq oynayıb. 5 hissə davam edən matçda Ayşənin komandası 2:3 hesabı ilə məğlub olub - 2:3 (25:23, 19:25, 15:25, 25:17, 8:15).

Komandasının qələbəni son anda əldən verdiyi oyunda yığmamızın üzvü 7 dəfə fərqlənib. Abduləzimova bu xallardan 5-ni hücumda, 1-ni blokda, 1-ni isə eyslə qazanıb. Millimizin digər üzvü Nikalina Başnakova isə əvəzetmə ilə meydana çıxıb və 5 xal qazanıb. Hücumçumuz meydan sahiblərini 3 dəfə hücumda, 2 dəfə eyslə məyus edib.