“Qarabağ” bu gün UEFA Çempionlar Liqasının pley-off mərhələsinin cavab matçında Xorvatiyanın “Dinamo” (Zaqreb) klubu ilə qarşılaşıb.

Rekord.az xəbər verir ki, 0:2 hesabı ilə məğlub olan Ağdam klubunun baş məşqçisi Qurban Qurbanovun oyundan sonra mətbuat konfransı keçirilib. Qurbanov bugünkü matçda oyunlarını daha çox rəqibin meydanında qurduqlarını bildirib:

“Əfsuslar olsun ki, məğlub olduq. İstəməzdim ki, uduzaq. Futbolçulara deyiləsi söz yoxdur. Xeyli sayda qol epizodlarımız oldu. Möhtəşəm azarkeşlərimizə təşəkkür edirəm, sonadək bizi dəstəklədilər.

Biz daha çox oyunumuzu rəqibin meydanında qururuq. Müdafiəyəmeyilli komandlar belə vəziyyətlərdən daha çox yararlanırlar. Bəzi epizodlarda rəqibin ustalığını da qeyd etməliyik. Bu komandadan beş qol buraxmışıqsa, bəzi xırda səhvlər var, razıyam. Çalışıb bu səhvləri aradan qaldırmalıyıq.

Ümumiyyətcə, bilmirəm yorğunluq fikri hardan yaranıb. Yorğun komanda bu qədər epizod yarada bilməz. Ümumiyyətlə, Xorvatiyadakı matçdan sonra da belə bir fikir formalaşmışdı. Bunun səbəbini bilmirəm. Hətta Aslan Kərimov da yorğunluqla bağlı fikir bildirmişdi. Bu gün 33 yaşlı Zubir 90 dəqiqə meydanda dayanmırsa, həmçinin Elvin Cəfərquliyev, digər futbolçular olsun, sona qədər mübarizə apardılar.

Məğlubiyyətdən də qabaq transferlər etməyi düşünürdük. Futbolçu gətirmək istəyirdik, alınmadı. Amma bu gün yeni oyunçu dəvət etmək istəyirik. Çünki qarşımızda sıx qrafik var. Çalışıb yeni transferlər edəcəyik.

Öz işini yüksək səviyyədə görən şəxs haqda fikir bildirməyim düzgün olmaz. İngiltərə Premyer Liqasında, avrokuboklarda oyun idarə edən hakimi qınaya bilmərəm. Belə bir hakimi Bakı meydanlarında görmək bizim üçün də xoşdur.

Məncə, azarkeşlərimiz bizə motivasiya vermək üçün belə bir fikir formalaşdırmışdılar ki, biz bu komandaya 3-4 top vurub mərhələni keçəcəyik. Buna görə də mən azarkeşlərimizə təşəkkür etmək istəyirəm ki, sona qədər bizə dəstək oldular. İnanıram ki, növbəti oyunlarda qalib gəlib onların inamını, güvənini bərpa edəcəyik”.

“Dinamo” (Zaqreb) – “Qarabağ” duelinin ilk qarşılaşmasında xorvatlar 3:0 hesablı qələbə qazanıb. Ümumi hesabda 0:5 hesabı ilə məğlub olan Ağdam klubu mübarizəni Avropa Liqasında davam etdirəcək.