Siyəzən şəhər stadionunun idman zalında 26 İyul - Azərbaycan Respublikası Gənclər və İdman Nazirliyinin yaranmasının 30 illik yubileyinə həsr olunmuş 2009, 2010, 2011-ci il təvəllüdlü yeniyetmələr arasında cüdo idman növü üzrə Siyəzən rayon birinciliyi keçirilib.

Rekord.az xəbər verir ki, birincilikdə çıxış edən Quba-Xaçmaz Regional Gənclər və İdman İdarəsinin Siyəzən rayonu üzrə gənclər və idman sektorunun aparıcı məsləhətçisi Cavidan Hüseynov və Siyəzən rayon Uşaq Gənclər İdman-Şahmat Məktəbinin direktoru Yavuz Əliyev birinciliyin məqsədləri və qaydaları haqqında məlumat verərək iştirakçılara uğurlar arzulayıblar. Quba-Xaçmaz Regional Gənclər və İdman İdarəsinin Siyəzən rayonu üzrə gənclər və idman sektorunun təşkilatçılığı ilə keçirilən yarışda 10 çəki dərəcəsində 40-a yaxın yeniyetmə cüdoçu yerlər uğrunda mübarizə aparıb.

Birincilik 26 İyul - Azərbaycan Respublikası Gənclər və İdman Nazirliyinin yaranmasının 30 illik yubileyinin qeyd olunması, cüdo idman növünün inkişaf etdirilməsi, idmanın bu növünə marağın artırılması, sağlam həyat tərzinin təbliği, idman yarışlarınn kütləviliyinin artırılması və asudə vaxtın səmərəli təşkil olunması məqsədi daşımışdır.

Birinciliyin mükafatlandırma mərasimində yer tutan cüdoçular Quba-Xaçmaz Regional Gənclər və İdman İdarəsinin medal və diplomları ilə təltif ediliblər.