Macarıstanın paytaxtı Budapeştdə güləş üzrə Avropa çempionatı davam edir.

Rekord.az xəbər verir ki, yarışın 4-cü günündə Elis Manolova (65 kq) mübarizəyə qoşulub.

B qrupunda yer alan təmsilçimiz ilk görüşdə Avropa ikincisi Tatyana Rijkoya (Ukrayna) məğlub olub - 0:7. Elis qrupda sonuncu görüşünü estoniyalı Viktoriya Essoya qarşı keçirib və rəqibinə 6:3 hesabıyla qalib gəlib. Qrupda ikinci yeri tutan Manolova yarımfinala yüksəlib. Millimizin üzvü 2019-cu ildə Avropa çempionatının finalında məğlub etdiyi Krişta İnçe (Rumıniya) ilə qarşılaşıb. Gərgin mübarizə şəraitində keçən görüşdən minimal fərqlə (2:1) qalib gələn Elis 4-cü dəfə Avropa çempionatının finalına yüksəlib. Güləşçimiz qızıl medal uğrunda ukraynalı Tatyana Rijkoyla mübarizə aparıb. Bu gün axşam seansında keçirilən həlledici görüş güləşçimiz üçün uğursuz alınıb. Yekunda Manolova AÇ-nin gümüş medalı ilə kifayətlənməli olub. Bu, onun qitə birinciliyində qazandığı 4-cü medaldır. Elis AÇ-lərdə 1 qızıl və 3 gümüş əldə edib.