Qətərdə keçirilən futbol üzrə dünya çempionatında xoşagəlməz hadisə yaşanıb.

Rekord.az xəbər verir ki, qalmaqalın səbəbkarı Kamerun Futbol Federasiyasının prezidenti Samuel Eto olub.

Hadisə Kamerun millisinin keçmiş hücumçusu stadionun yaxınlığında azarkeşlərlə şəkil çəkdirdiyi vaxt baş verib. Həmin vaxt hər şeyi kameraya çəkən əlcəzairli "yutuber" Etoya nə isə deyib. Elə bundan sonra özündən çıxan Eto həmin şəxsin üstünə hücum çəkib. Əvvəlcə onu itələyən keçmiş futbolçunu ətrafdakılar sakitləşdirməyə çalışsa da, Eto həmin şəxsin üzünə təpik vurmağa da imkan tapıb. Daha sonra Etonun yanındakı şəxslərdən biri zərərçəkmişin kamerasını əlindən alıb.

Hadisə dünya çempionatının 1/8 final mərhələsinin Braziliya – Cənubi Koreya oyunundan (4:1) sonra baş verib. Qeyd edək ki, Qətər-2022-in seçmə mərhələsində Kamerunla Əlcəzair bir-birinə rəqib olublar. Həmin oyunda Kamerun qalib gəlsə də, Əlcəzair tərəfi hakimlikdən ciddi narazılıq qalıb. Deyilənə görə, əlcəzairli "yutuber" də həmin oyunu Etoya xatırladıb ki, bu da veteran hücumçuya xoş getməyib.