“Zirə”nin baş məşqçisi Rəşad Sadıqov “Şamaxı” (3:1) ilə bu gün keçirilən yoxlama oyunundan sonra qarşılaşma və qış toplanışı haqda fikirlərini bildirib.

Rekord.az xəbər verir ki, o, bunları söyləyib:

“Budəfəki qış fasiləsi əvvəlkilərdən bir az fərqlidir. 28-29 gün vaxt oldu, amma nəzərə almaq lazımdır ki, bu müddət aralığında 31 dekabr var idi. Plan qurmaq bir az çətin idi. Aydın məsələdir ki, futbolçuların çoxu həmin gün evdə olmaq istəyirdi. Ona görə də ilk rəsmi oyunumuza hazırlaşmaq üçün 15-16 gün vaxtımız var idi. Hazırlıq üçün istənilən qədər vaxt yox idi. Bu müddətə də “Şamaxı” və “Qarabağ”la iki yoxlama oyunu planlaşdırmışıq. Bu gün də ilk oyun idi, buna baxmayaraq, futbolçular məsuliyyətli və istəkli idilər. Düşünürəm ki, hər iki komanda üçün yaxşı hazırlıq oyunu oldu”.