Qazax daha çox güləşi və güləşçiləri ilə tanınsa da, futbolda da xüsusi yeri var. Bu rayonu təmsil edən "Göyəzən" hələ sovet dönəmindən ölkənin güclü komandalarından olub, SSRİ çempionatının II dəstəsinin 9-ci zonasında çıxış edib. Həmin vaxtlar rayon stadionunda baş tutan qarşılaşmaları 10 mindən çox azarkeş izləyərdi. "Göyəzən" müstəqil çempionatımızda da çıxış edib və çıxış etdiyi dönəmlərdə iddialı olmasa da, iddialılara baş ağrısı olması ilə diqqət çəkib. Təəssüf ki, uzun müddətdir Qazax futbol elitamızdan uzaq düşüb. Hazırda "Göyəzən" "Region Liqası"nda çıxış edir. Lakin bir qədər dəstək olarsa, "Göyəzən"i yenidən daha yüksək liqalarda görə bilərik. Rekord.az əməkdaşı Qərb bölgəsinə səfəri zamanı Qazaxda da olub və rayonun futbol potensalı ilə yaxından tanış olub.  Həmçinin, "Göyəzən"in baş məşqçisi Elxan Muradovla söhbətləşin bu potensialı birlikdə müzakirə etdik. Elxan bəy çox pozitib və iddialı idi. Şübhə etmir ki, AFFA-nın da azacıq dəstəyi olsa, çox rahat şəkildə II Liqada çıxış edə bilərlər: "Bizim hədəfimiz II Liqada oynamaqdı. Ötən il də hədəfimiz II Liqa idi. Lakin təəssüf ki, finala qədər gəlsək də, finalda uduzduq. 4 aparıcı futbolçumuzun yoxluğu sözünü dedi. Dördü də müdafiəçi idi. Bu il də hədəfimiz uğurunda sona qədər vuruşacayıq. Yaxşı komanda yığmışıq, ruh yüksəkliyi, mehribançılıq var. Hazırda da "Region Liqası"nda yer aldığımız qrupda iki oyun keçirmişik və hər ikisində qalib gəlmişik. Final mərhələyə vəsiqə qazansaq, heyətimizi daha da gücləndirəcəyik".

Baş məşqçi maddi baxımdan sıxıntılarının olmadığını da bildirdi: "Bizim sponsorumuz "TuranBank"dı və komandanı hərtərəfli şəkildə təmin edirlər. Nə deyirik, onu da edirlər. Forma deyirik, alırlar, top deyirik, alırlar, buts deyirik, alırlar. Biz II Liqada niyə oynamaq istəyirik? İstəyirik ki, ordan verilən pulu maaşa yönəldək. Az öncə də edim, top, forma, buts, yemək səfər xərclərimizin hamısını "TuranBank" ödəyir.  "Region Liqası" səviyyəsində şəraitimiz çox yaxşıdı. Hətta bəzi məsələlərdə I Liqa komandalarından da geri qalmırıq. Məsələn, lazım olanda oyunlara bir gün öncədən gedirik. Yəni belə bir problemimiz yoxdur, bu pul var, öz yerində. II Liqada oynasaq, az öncə dediyim kimi, AFFA-dan gələcək əlavə vəsaiti tamamilə futbolçuların maaşına yönəldəcəyik, onların maaşını daha da artıracağıq". 

Muradov II Liqada oynayacaqları təqdirdə, hədəflərinin yalnız I Liqa olacağını da gizlətmədi: "II Liqanın səviyyəsi təbii ki, bir qədər yüksəkdi. Çünki həmin liqanı da izləyirəm, komandaların vəziyyətindən xəbərdaram. Təbii ki, orda oynasaq, güclənməliyik. Baxıram ki, hazırkı heyətdən 10 nəfəri saxlayacayıq. Amma 8 nəfər də kənardan gətirməliyik".

Həmsöhbətimiz infrastrukturla bağlı məsələyə də toxundu: "Bilirsiniz necədi, bəzən görürsən gəlirlər, 10-15 il bundan qabaq qalmış bir kolu çəkib aparıb paylaşırlar ki, Qazax stadionu belədi. Belə deyil axı. Özünüz də stadionla tanış oldunuz, şəraiti gördünüz. Bizdə şərait II Liqada çıxış edən bir çox klubun şəraitindən yaxşıdı. Stadionumuzun 8 hektar ərazisi var. Ot örtüyümüz yaxşıdı, sağ olsun, "TuranBank" 5-6 min xərc çəkdi, stadiona su çəkdirdi, tribunanın bəzi yerlərini, hamamı təmir etdirdik və bu işlər də yavaş-yavaş davam edir, yayda soyunub-geyinmə otaqlarının da təmiri gözlənilir. Yəni bütün bu işlər görülür axı, sağ olsunlar. Maaşlarımız il boyu vaxtlı-vaxtında ödənilir. Hətta yay boyu da maaşların verilməsi davam edir. Halbuki çox komandada bu yoxdur". 

Muradov yerli futbolçuların potensialından da söz açdı: "Bir ara bu sahədə boşluq var idi. Lakin son iki ildə bu məsələni də yoluna qoymuşuq. Bu gün "Göyəzən"in aşağı yaş qruplarından ibarət komandaları da fəaliyyət göstərir. U-9-dan U-14-ə qədər yaş qruplarından ibarət komandalarımız var. Hamısı da AFFA-nın bayrağı altında keçirilən ökə çempionatının zona yarışlarında çıxış edir, hər həftə gedib Tovuzda oynayırıq. Düzdür, əsas komandada oynayanlar hamısı qazaxlı deyil, Tovuzdan olan futbolçularımız da var. Lakin aşağı yaş qruplarında hamısı qazaxlıdır və onları gələcəkdə əsas komanda üçün hazırlayırıq. Yaxşı turnirlər keçiririk, hansı ki, şəhidlərimizin xatirəsinə həsr olunur, şəhid atalarını da dəvət edirik. İmkanımız nəyə çatır, edirik. Baza mütləq olmalıdır, yerli futbolçu bazan olmasa, orada futbolun olması çətin məsələdir. Mən özüm B kateqoriyasını almışam, köməkçim Süleyman müəllim C-ni alıb, digər məşqçilərimizi də bu yöndə hazırlayırıq. Bir ilin içində "Turan Tovuz"a 4 uşaq vermişik. Tovuzda akademiyanın açılmasının bizə çox faydası var. Eləcə də "Turan Tovuz"un Premyer Liqada oynamasının. Çünki regionda olan uşaqlarda maraq var ki, gedib ora düşsün, orda qalsın. Yoxsa əvvəl bizdə də yox idi, Tovuzda da yox idi, uşaqlar da qalırdı belə ki, hara getsin. Bakıya da hər valideynin imkanı yoxdur uşaq aparsın".

Elxan bəy həftədə bir dəfə məşq etdiklərini bildirib: "Hələ ki, gücümüz buna çatır. Çünki Tovuzun kəndlərindən gələn futbolçularımız var. Onlar hər gün məşqə gəlib-getsə, elə 150 manat bunların yol puluna çıxacaq. Bundan başqa, başqa işdə işləyən futbolçularımız da var. Buna görə həftədə bir dəfə məşq edirik və onu da elə günə salırıq ki, hamı gələ bilsin. Amma II Liqaya yüksəlsək, maddi imkanlarımız bir qədər də artsa, durum da fərqli olacaq. Deyək ki, hansısa futbolçumuz kənarda işləyib ayda 300 manat maaş alır. Biz o pulu burda ona verəndən sonra, gəlib məşqini də edəcək, oyuna da çıxacaq".

Sonda qeyd edək ki, "Göyəzən"də forma geyinən futbolçular arasında dörd qazi dı var. Bunlardan biri olan Anar Hümmətovla da görüşüb onun da fikirlərini öyrəndik: "Şuşa, Xocavənd, Kəlbəcərdə döyüşmüşəm, Şuşaya qədər gedib çıxmışam. Həm "şücayətə görə", həm də "Vətən uğurunda" döyüş medalı almışam. Özüm hərbçi olmuşam, "N" saylı hərbi hissənin taborunda xüsusi təyinatlılarda qulluq etmişəm. Döyüşlərin ilk günündən cəbhədə olmuşam, 15 gün Kəlbəcər istiqamətində döyüşmüşəm, sonra başqa bölüklə Şuşa istiqamətinə göndərilmişəm və Şuşaya qədər gedib çıxmışam. Futbolla isə 14-15 yaşımdan məşğul olmuşam, "Göyəzən"in yetirməsiyəm. Hədəfimiz II liqaya yüksəlməkdi və komandamızda bu potensialı görürəm".

Anar XANLAROV