Macarıstanda çıxış edən qadın voleybolçulardan ibarət Azərbaycan millisinin üzvü Nikolina Boşnakova növbəti oyununa çıxıb. "Rekord.az" xəbər verir ki, hücumçumuzun formasını geyindiyi "Szent Benedekt" klubu 6-cı turda "Fatum"la üz-üzə gəlib. 

Səfərdə baş tutan görüş voleybolçumuzun komandası üçün uğursuz alınıb. Yalnız bir setdə sevinə bilən Nikolina və rəfiqələri qarşılaşmadan 1:3 (24:26 ,25:19, 12:25, 20:25) hesablı məğlubiyyətlə ayrılıblar. 

"Szent Benedekt"in xalsız qaldığı matçda yığmamızın üzvü 15 xal qazanmaqla komandasının ən məhsuldar oyunçusu olub. Boşnakova meydan sahiblərini 11 dəfə hücumda, 4 dəfə isə blokda məyus edib.

Qeyd edək ki, 6 oyundan sonra hesabında 10 xal olan "Szent Benedekt" turnir cədvəlində 3-cü pillədə qərarlaşıb.