İsmayıllı rayon E.Məmmədov adına 3 nömrəli məktəb-liseydə Dağlıq Şirvan Regional Gənclər və İdman İdarəsinin və İsmayıllı Təhsil Sektorunun birgə təşkilatçılığı ilə “Heydər Əliyev İli” və “ 31 Dekabr-Dünya Azərbaycanlılarının Həmrəyliyi Günü” münasibətilə məktəblilər arasında voleybol idman növü üzrə rayon birinciliyi keçirilib.

Rekord.az xəbər verir ki, tədbirin keçirilməsində məqsəd Ulu öndər Heydər Əliyevin Azərbaycançılıq məfkurəsini gənclər arasında geniş təbliğ edilməsi, tarixi günlərin əhəmiyyətinin onlar tərəfindən mənimsənilməsi, belə hadisələrə düzgün rəy vermək bacarığını formalaşdırmaq, vətənpərvərlik hissini yüksəltmək və bu idman növünə marağın arıtılması olub.

 İlk öncə Azərbaycanın ərazi bütövlüyü uğrunda mübarizədə canlarını qurban vermiş şəhidlərimizin və Ümummilli Lider Heydər Əliyevin əziz xatirəsi bir dəqiqəlik sükutla yad olundu.

Tədbir öncəsi çıxışçılar qeyd edərək bildiriblər ki, xalqımız, eləcə də dünyanın müxtəlif ölkələrində məskunlaşmış soydaşlarımız, hər il dekabrın 31-ni "Dünya Azərbaycanlılarının Həmrəylik Günü"nü böyük həvəs və coşqu ilə qeyd edir. Bu bayram ildən-ilə daha geniş vüsət alır, daha geniş şəkildə keçirilir. Azərbaycanı özünə tarixi Vətən bilən hər bir şəxsin həmrəylik nümayiş etdirməsi qürurvericidir.

Maraqlı və gərgin keçən birincilikdə 3 nömrəli məktəb-lisey komandası birinci yeri, 5 nömrəli tam orta məkəbin komandası ikinci yeri, müvafiq olaraq 1 nömrəli tam orta məktəb və Talıstan kənd tam orta məktəblərin komandaları isə üçüncü yeri qazanıblar.Qalib komandalar DŞR Gənclər və İdman İdarəsinin diplomları ilə mükafatlandırılıblar.