Qadın voleybolçulardan ibarət Azərbaycan millisinin üzvü Ayşən Abduləzimova Macarıstan çempionatında növbəti oyununa çıxıb. "Rekord.az" xəbər verir ki, təcrübəli blokçumuzun şərəfini qoruduğu "Vasas Obuda" təzə ilin ilk qarşılaşmasında "MAV Elore" klubu ilə üz-üzə gəlib. 

Doğma meydanda baş tutan görüş voleybolçumuzun komandası üçün uğurlu alınıb. İlk setdən təşəbbüsü ələ alan Ayşən və rəfiqələri üstünlüklərini sonadək qoruyublar. 3 hissə davam edən matçda meydan sahibləri quru hesablı (3:0 (25:16, 25:16, 25:18)) qələbə qazanıblar. 

Komandasının ilə qələbə ilə başladığı oyunda millimizin və "Vasas Obuda"nın kapitanı 12 dəfə fərqlənib. Abduləzimova bu xallardan 8-ni hücumda, 3-nü blokda, 1-ni isə eyslə qazanıb.