"Liverpul" qış transfer pəncərəsi bağlanmazdan əvvəl heyətinə yeni müdafiəçi cəlb etməyə çalışacaq.

Rekord.az xəbər verir ki, bu barədə klubun baş məşqçisi Yurgen Klopp məlumat verib.

O, zədəli müdafiəçilərin çoxluğu səbəbindən bu fikirdə olduqlarını bildirib:

"Transferlərin olub-olmayacağını bilmirəm, amma çalışacağıq. Deyəcək bir sözüm yoxdur, bir şey oluncaya qədər görəcəyik. Əlbəttə ki, maddi vəziyyətimizə uyğun oyunçu tapmalıyıq.

Bu anda 80 milyon funt sterlinqlik bir mərkəz müdafiəçisi olduğuna və klubların onu satmağa hazır olduğuna əmin deyiləm. İndi bu cür oyunçuları satmaq istəyənlər azdır".

"Liverpul"un müdafiəçisi Joel Matip dünən İngiltərə Premyer Liqasının 20-ci turunda keçirilən "Tottenhem"lə matçda (3:1) zədələnib. Bundan sonra komandada sağlam iki mərkəz müdafiəçisi qalıb.