Kişi voleybolçulardan ibarət Azərbaycan millisi Avropa çempionatının təsnifat mərhələsinə hazırlığı davam etdirir. "Rekord.az" xəbər verir ki, komandamız bu məqsədlə Gürcüstana təlim-məşqə yollanıb.

Fərid Cəlalovun çalışdırdığı yığmamızın Tbilisidəki toplanışı avqustun 11-də yekunlaşacaq. Hazırlıq çərçivəsində komandamızın Gürcüstan yığması ilə bir neçə yoxlama matçı keçirməsi də nəzərdə tutulur.

Qeyd edək ki, komandamız AVRO-2026-nın təsnifat oyunlarında B qrupunda Avstriya və Belçika yığmalarına qarşı mübarizə aparacaq. Millimiz seçmə mərhələdəki ilk matçına avqustun 17-də çıxacaq. Komandamız həmin gün səfərdə Avstriya kollektivinin qonağı olacaq. Yığmamız növbəti görüşünü isə avqustun 24-də Bakıda Belçika komandasına qarşı keçirəcək. Yarışın formatına uyğun olaraq digər iki qarşılaşma 2025-ci ilin avqustunda baş tutacaq.