Birləşmiş Ərəb Əmirliklərinin “Baniyas” komandasında baş məşqçi dəyişikliyi olub.

Rekord.az xəbər verir ki, Azərbaycan millisinin futbolçusu Riçard Almeydanın çıxış etdiyi klub müqaviləsinin müddəti başa çatan Vinfrid Şaferlə anlaşmanı yeniləməyib.

Vaxtilə Azərbaycanda “Bakı”nın da baş məşqçisi olmuş 70 yaşlı almaniyalı mütəxəssis 2019-cu ilin iyulundan “Baniyas”ı çalışdırırdı. Elə Almeyda da məhz onun dönəmində BƏƏ klubuna transfer olunmuşdu.

Artıq komandanın yeni baş məşqçisi də məlumdu. Klubun mətbuat xidmətinin yaydığı məlumata görə, “Baniyas”ı bundan sonra rumıniyalı Daniel İsaila çalışdıracaq. Onunla müqavilənin detalları barədə məlumat verilməyib.