Gözlənildiyi kimi, Samir Abasovun da sehirli çubuğu yoxdur və onun gəlişi ilə vəziyyət nisbətən (mövsümdə ilk qələbə qazanıldı) düzəlsə də, köklü dəyişiklik olmadı. Yəni, Samir müəllim gələn kimi, "Neftçi" qələbələri sıralayıb qabağına gələni uda-uda getmədi. "Səbail" üzərindəki qələbəni çıxsaq, vəziyyət nəticə baxımından aşağı-yuxarı eynidi ("Sabah"-1 xal, "Araz Naxçıvan-0 xal, "Şamaxı"-1 xal). Məsələn, Abasov "Neftçi"yə baş məşqçi təyin olunandan sonra 4 oyuna 5 xal yığıb. Onun yerinə "Sumqayıt"ın baş məşqçisi postuna keçən daha gənc və daha təcrübəsiz Vaqif Cavadov isə 3 oyuna 6 xal yığıb. "Sabah"ı başa düşmək olar. "Araz Naxçıvan"dan heç olmasa 1 xal alınsa idi, onu da başa düşmək olardı, amma mümkün olmadı. "Şamaxı" ilə oyunun ilk 5 dəqiqəsinə 2:0 üstün girdiyin oyunu necə əldən verə bilərsən? "Şamaxı" ilk 5 dəqiqəyə 2 qol vurub sonradan bu üstünlüyü əldən versə, anlamaq olar ki, təcrübəsi, səviyyəsi çatmadı, "Neftçi" daha təcrübəli komandadı, ilk dəqiqə şokunda ayılıb ən azı 1 xal qoparda bildi. Amma əksinə olunca, suallar artır. Abasovu tam olaraq, qınamaq olmur, haqlı olaraq deyəcək ki, bu heyəti mən yığmamışam və heç kim də bu sözünə görə onu tənqid edə bilməz. Bu gün "Neftçi"nin xüsusilə müdafiə xətti bərbaddı. Mən hələ Qriqorçukun vaxtında dəfələrlə bunu demişdim. Bu müdafiə xətti ilə sən ötən mövsümü 5-ci pillədə bitirmisən. Eyni müdafiəçilərlə mövsümə başlayıb çempionluğa iddia etməyin absurd olardı. Samir Abasov da gəlib birdən-birə 5 müdafiəçini nə göndərə bilər, nə də ehtiyata ata bilər. Məcburdu dəyiş-düyüş edə-edə Mattias, Koffi, Tamaş, Höccət və s. oynamağa. Ştorqini bu gün Kəpəz"ə də versən, götürməz. Quzzonu Qruqorçuk elə bəh-bəhlə tərifləmişdi ki... Adam meydançada bildiyin sürünür. Boqomolski, Bauman, Şinyaşiki, Darbo heç nə ilə komandaya kömək edə bilmir. Hələ mən sifariş ərizəsinə düşməyib hər ay kartına külli miqdarda pul oturan Sek, Konte kimi legionerləri demirəm. Bəlkə də başqa komandaya gedib aparıcı oyunçu ola bilərlər. Məsələn Edvin Kuç Monteneqro millisində Yankoviçi ehtiyatda oturdub əsas heyətdə oynayır. Amma "Neftçi" forması ilə meydançaya çıxanda olur sıradan oyunçu. Qısası, görünən budur ki, qışa qədər sıxıntılar davam edəcək. Samirin ciddi müdaxilələri və onun nəticələri qışdan sonra görünəcək.

Anar XANLAROV