"Qarabağ"ın baş məşqçisi Qurban Qurbanov Azərbaycan Kubokunun yarımfinalının ilk oyunlarında "Araz-Naxçıvan"a 0:1 hesabı ilə uduzduqları oyunu şərh edib. 

Rekord.az xəbər verir ki, o, matçdan sonra keçirilən mətbuat konfransında əvvəlvə “Araz-Naxçıvan"ı təbrik edib:

"Qalib gəlmək üçün hər şey etdilər, vuruşdular. İstəkləri çox idi. Düzdür, hələ cavab oyunu var. Amma üzərimizə düşən vəzifə rəqibi təbrik etməkdir. Ümumi oyun haqda çox danışılası bir şey yoxdur. Düzünü desəm, elə də keyfiyyətli oyun olmadı. Kubok oyunları çempionat oyunlarından həmişə fərqlənib. İnşallah, cavab oyununa hazırlaşacağıq. Ona qədər vaxtımız çox olacaq". 

Qurbanov bu matçda emosional olmasına, penalti epizodu səbəbindən planşeti qırmasına da toxunub, yerli komandalara məğlub olmağı bacarmadığı haqda fikrə münasibət bildirib. O deyib:

“Mən dəfələrlə məğlub olmuşam və özümü də normal aparmışam. İnsanıq, aqressiya olur. Ola bilər ki, penalti zərbəsi idi və biz yanılırıq. Buna bir şey demirəm. Sadəcə, bizə gəlib ümumi hər şeyi başa salanda deyirlər ki, penalti kosmosdan görünməlidir. Mən istəyirəm ki, oyun daha dinamik keçsin, daha mübarizəli olsun. Amma pauzalar çox oldu. Ola bilər, hakim də öz ritmini itirir. O ki qaldı yerli komandalara məğlubiyyəti qəbul edə bilmədiyimə, əksinədir. Mən çox istəyirəm ki, hər bir komanda "Qarabağ"a qalib gəlsin, klubların rəhbərliyində futbola sevgi çox olsun, maraq böyüsün".

Qurbanov planşeti də penalti epizoduna görə qırdığını söyləyib:

"Aqressiyaya qaldıqda, biz də insanıq. Ömürboyu sakit ola bilmərik. Normal bir epizoddur. Penalti epizodunu da dedim. Ona görə planşeti vurdum”.