"Qəbələ”nin Futbol Akademiyasında yetişən, vaxtilə bölgə təmsilçisinin, eləcə də “Zirə”nin heyətində Premyer Liqa həyəcanı yaşayan Sadiq Quliyev klubsuzdur.

Ötən mövsüm bölgə təmsilçisinin uğurları üçün tər tökən 26 yaşlı mərkəz müdafiəçisi yayda futbolçu kimi yetişdiyi komandanı tərk etsə də, başqa komandalarda adına rast gəlmədik.

Rekord.az xəbər verir ki, Sadiq sportinfo.az-a açıqlamasında işsiz qalmasının səbəbini açıqladı:

“Qəbələ”dən ayrılandan sonra 1-2 klubdan maraqlananlar oldu. Lakin birbaşa müqaviləyə yox, baxışa çağırırdılar. Mən isə, bununla razılaşmadım. Azərbaycan futbol təsərrüfatı kiçikdir, hamı bir-birini tanıyır. Ona görə də buna gərək duymadım”.

Quliyev futbolsuz qalsa da, gələcəyə nikbin baxır: “Yəqin ki, burda heç kimə lazım deyiləm. Ona görə də xaricə getmək barədə fikirləşirəm. Açığı, bu yöndə işlər gedir. İnşallah, yaxın zamanda bir xəbər olar”.

Sadiq Quliyev U-21 daxil olmaqla Azərbaycanın aşağı yaş qruplarından ibarət bütün millilərinin şərəfini qoruyub. O, həmçinin, 2017-ci ildə ölkəmizdə təşkil olunmuş İslan Həmrəyliyi Oyunlarının qalibidir.