“Qarabağ”ın baş məşqçisi Qurban Qurbanov Azərbaycan kubokunun 1/4 final mərhələsi çərçivəsində “Keşlə”yə qarşı keçirdikləri cavab oyununu (3:1, ilk oyun 1:0) şərh edib.

Rekord.az xəbər verir ki, Ağdam klubunun çalışdırıcısı matçdan sonra təşkil olunan mətbuat konfransında bunları söyləyib:

- Ağır oyun oldu, futbolçularıma təşəkkür etdim. Hər birimiz ağır dövr keçirdik. İstirahət dövrümüz az olacaq.

- Yarımfinal mərhələsində rəqib "Sumqayıt"dı. Çempionatdakı məğlubiyyətin qisasını almaq haqqında düşünürsüz? 
- Bu barədə düşünmək üçün tezdi. Kubok fərqli bir turnirdi. Bu oyunlara hazırlaşmaq üçün vaxtımız olacaq. Hər iki komandada dəyişiklik ola bilər. Oyuna yaxın daha ətraflı cavab verə bilərik. 

- Ötən mövsüm qış fasiləsinə 2-ci pillədə yollanmışdız, bu dəfə isə ilk pillədə. Sizcə, "Neftçi" zəifləyib, ya "Qarabağ" güclənib?
- Hər bir komanda mübarizə aparır. Bu dəfə xal fərqi başqa oldu, amma bu o demək deyil ki, "Neftçi" zəifləyib, ya da biz güclənmişik. Əminəm ki, hər iki komanda qış fasiləsindən sonra daha ciddi hazırlaşacaq.

- Musa Qurbanlının oyunu necə təsir bağışladı?
- Hələ debüt oyunu idi. Formalaşması üçün vaxt lazımdı. Fikir bildirmək tezdi. Öz üzərlərində çox çalışmalıdılar. 

- Göndəriləcək futbolçular müəyyənləşib?
- Bu gün Simeon Slavçevlə yollar ayrıldı. Hələ ki, heç bir fikir deyə bilmərəm. Gətirmək istədiyim futbolçular var. Hər dəfə deyirəm, amma heç bir dəyişiklik yoxdu. 

- Pedro Enrikenin komandaya qaytarılacağı ilə bağlı xəbərlər yayılıb. 
- Danışıqlar olub, amma bu transfer alınmadı. 

- Asmir Beqoviçin gedişindən sonra yeni qapıçı transferi olacaq?
- Bir neçə variant var, danışıqlar gedir. Hələ "Bornmut" rəhbərliyi ilə danışıqlar olacaq. Amma görünən odu ki, asan həll olunacaq transferə bənzəmir. 

- Vaqner da Silva 4 aydı oynamır. Oyun formasını bərpa etmək çətin olmayacaq? 
- Düşünmürəm, çünki qapıçılar ən az oyun keçirən futbolçularımızdı. Şahruddin də 3 ay idi ki, oynamırdı. Belə problemin olacağını düşünmürəm. 

- "Keşlə" üzərində qələbəyə çox sevindiz, yoxsa gənc futbolçulara görə? 
- Bu barədə düşünməmişdim, amma indi düşündüm. Qələbəyə sevinirik, amma 3-cü qolda gənclər daha çox sevindi. 

- Riçard Almeydanın müqaviləsinin müddəti bitdi. Yeni qərar necə olacaq? 
- Bitdi, amma hələ razılıq olmayıb. Danışıqlara başlamışıq, amma hələ razılaşmamışıq. (komanda.az)