Sabah Konfrans Liqasının II turu çərçivəsində səfərdə Kipr "Omoniya"sının qonağı olacaq "Qarabağ"ın baş məşqçisi Qurban Qurbanov bu gün oyun öncəsi ənənəvi mətbuat konfransı keçirdib. Rekord.az xəbər verir ki, fikirlərini bölüşən Qurbanov jurnalistlərin suallarını da cavablandırıb:

 

- Hər birinizi salamlayıram. Son zamanlar bu ölkəyə tez-tez gəlirik, mənim üçün xoşdu. Hər dəfə fərqli komandalara qarşı oynayırıq, hər komandanın da öz oyun tərzi, öz oyun fəlsəfəsi var. “Omoniya” digər komandalardan fərqlidir. Sabah meydançada daha çox düşünmək lazım olacaq. İstəyirik burada yaxşı oyun göstərək və çalışacağıq ki, sabah hər şeyin ən yaxşısını edək. Bu komandaya qarşı həm aktiv olmalıyıq, həm də diqqətli. Onları 90 dəqiqə nəzarətdə saxlamalıyıq. Düşünürəm ki, sabah ən yaxşı oyuunlarımızdan birini oynayacağıq.

 

- Daha öncə APOEL-lə 4 dəfə oynamısınız, eləcə də daha iki dəfə AEL-lə üz-üzə gəlmisiniz. Kipr futbolu ilə bağlı fikirləriniz maraqlıdır...

 

- Az öncə də qeyd elədim ki, bu ölkənin komandalarına qarşı çox oyanmışıq və hər birinin də xarakteri var, idman xarakteri.  Qalib gəldiyimiz oyun da oldu, məğlub olduğumuz oyun da. Amma həm burda, həm də Bakıda azarkeşlər maraqlı oyunun şahidi oldular. Nəticə öz yerində, düşünürəm ki, oyun planında da bu qarşılaşmalar futbolçularım üçün çox faydalı oldu.

 

- "Omoniya"nın güclü tərəfləri hansıdı, hansı ki, sabah məhz o barədə diqqətli olmalısınız?

- Güclü tərəflərinin hansı olduğunu burda söyləsəm, bəlkə də düzgün çıxmaz. Ümumiyyətlə, öz oyun fəlsəfələri var və oyun boyu bunu meydanda yerinə yetirməyə çalışırlar. Eyni zamanda bunu edəcək kollektiv var meydanda. Biz də məhz bu kollektivə qarşı mübarizə aparacağıq. Kollektiv oyun "Omoniya"nın ən təhlükəli tərəflərindən biridir. Ayrı-ayrılıqda da bacarıqlı futbolçuları var. Hansı ki, verilən tapşırığı yerinə yetirməkdə çox istəklidilər. Təbii ki, qələbə qazanmaq üçün daha çox hücumda oynamalıyıq. Amma ola bilsin ki, rəqib baş məşqçi bizə sürpriz edib sabah fərqli sistemdə oynasın. Necə ki, "Kayrat"a qarşı bunu etmişdi. Buna görə dedim ki, vacib olan bizim futbolçuların meydandakı diqqətidir.