Portuqaliya millisinin superulduzu Kriştianu Ronaldu DÇ-2022-nin seçmə mərhələsi çərçivəsində baş tutan qarşılaşmada - İrlandiya ilə ev oyununda (2:1) imza atdığı dünya rekordunu şərh edib.

Rekord.az xəbər verir ki, matçın 89-cu dəqiqəsində yığma formasıyla 110-cu qolunu vuraraq İran millisinin sabiq hücumçusu Əli Daeinin (109 qol) uğurunu kölgədə qoyan hücumçu UEFA-nın saytına danışıb:

"Azarkeşlərin dəstəyi çox önəmlidir. Onlar bizə yardımçı oldular. Bu rekordu reallaşdıra bildiyim üçün çox şadam. Amma komandanın uğuru birincidir.  Qələbə qazandığımız üçün sevincimin həddi-hüdudu yoxdur. 

Bu, mənim rekordumdur, unikal nəticədir. Futbol oynamağa davam etməkdə qərarlıyam. Onu da deyim ki, bir neçə gün öncə evimə - "Mançester Yunayted"ə dönməyim mənim üçün xüsusi motivasiya oldu. Hər gün daha yaxşı olmaq hədəfi ilə oyanmaq, azarkeşləri və öz uşaqlarını sevindirməyi qarşına məqsəd qoymaq olduqca vacib amildir".

Qeyd edək ki, 89 və 90+6-cı dəqiqələrdə vurduğu qollarla Portuqaliyaya qələbə qazandıran Ronaldu milli formayla vurduğu qolların sayını 111-ə çatdırıb.