Qadın voleybolçulardan ibarət Azərbaycan millisinin üzvü Marqarita Stepanenko Rusiyada çempionatında növbəti oyununa çıxıb. "Rekord.az" xəbər verir ki, hücumçumuzun formasını geyindiyi və qonşu ölkənin birinciliyində mübarizə aparan Belarusun "Minçanka" klubu 23-cü turda Kalininqradın "Lokomotiv" kollektivi ilə üz-üzə gəlib. 

Doğma meydanda baş tutan görüş "Minçanka" üçün yaxşı başlamayıb. İlk iki seti uduzan voleybolçumuzun komandası sonrakı hissədə qələbə qazana bilib. Lakin Belarus təmsilçisinin bundan artığına gücü çatmayıb. 4 hissə davam edən matçda Rita və rəfiqələri 1:3 (23:25, 19:25, 25:22, 16:25) hesabı ilə uduzublar. 

Komandasının xalsız qaldığı qarşılaşmada yığmamızın üzvü 3 set oynayıb. Stepanenko meydanda olduğu müddətdə 8 xal qazanıb. O, qonaqları 7 dəfə hücumda, 1 dəfə isə blokda məyus edib.