Şabran rayon Ağsaqqallar Evində Quba-Xaçmaz Regional Gənclər və İdman İdarəsinin Şabran rayonu üzrə gənclər və idman sektoru və Quba-Xaçmaz Regional Təhsil İdarəsinin nəzdində fəaliyyət göstərən Şabran rayon Uşaq Gənclər İdman-Şahmat Məktəbinin birgə təşkilatçılığı ilə Gənclər və İdman Nazirliyinin yaranmasının 30 illik yubileyinə həsr olunmuş 8,10, 12, 14 və 16 yaşlı uşaq və yeniyetmə oğlan və qızlar arasında şahmat idman növü üzrə Şabran rayon turniri keçirilmişdir.

Rekord.az xəbər verir ki, Gənclər və İdman Nazirliyinin yaranmasının 30 illik yubileyinin qeyd edilməsi, uşaq və yeniyetmələrin idmanın bu növünə marağının artırılması, perspektivli şahmatçıların aşkar edilməsi, onların aktiv həyata cəlb edilməsi və asudə vaxtının səmərəli təşkil edilməsi məqsədilə keçirilmiş yarışda 44 nəfər uşaq və yeniyetmə şahmatçı birincilik uğrunda mübarizə aparmışdır.

Yarışın sonunda müxtəlif yaş qrupları üzrə qaliblər Quba-Xaçmaz Regional Gənclər və İdman İdarəsi tərəfindən müxtəlif dərəcəli diplom və medallarla təltif olunmuşlar.

Tədbirin mükafatlandırma mərasimində Quba-Xaçmaz Regional Gənclər və İdman İdarəsinin Şabran rayonu üzrə gənclər və idman sektorunun müdiri Süleyman Əliməmmədov, Quba-Xaçmaz Regional Təhsil İdarəsinin nəzdində fəaliyyət göstərən Şabran rayon UGİŞM-in direktoru Zeynal Zeynalov və məşqçi-müəllimlər iştirak etmişlər.