“Səbail” klubunun Müşahidə Şurasının sədri Əbdülqəni Nurməmmədov "Qəbələ" ilə oyundan sonra (1:0) Rekord.az-a müsahibə verib:

- Baş məşqçiniz Şahin Diniyev mətbuat konfrnsında bildirdi ki, komandanın hazırkı çıxışı və turnir cədvəlindəki mövqeyi onun üçün gözlənilməz oldu. Siz komandanın cari mövsümdəki çıxışını necə qiymətləndirərdiniz?

- "Qəbələ" ilə bugünkü oyunda mən heç-heçəyə də razı idim, obyektiv danışmaq lazımdır. Komanda niyə bu mövsüm daha yaxşı çıxış edir, gələn legionerlərin səviyyəsi ötən mövsümkü legionerlərlə müqayisədə daha yaxşıdır. 

- Komandanın qarşısına konkret hansı hədəf qoyulub, avrokuboklara vəsiqə, ya necə?

- Yox, avrokuboklara vəsiqə hədəfi qoyulmayıb. Şahin müəllim hansı fikirləri səsləndirib, mən bilmirəm, amma şəxsən mən bu mövsüm üçün 5-6-7-ci yerə razıyam. 

- Bəs komandanın potensialı necədi?

- Potensial günü-gündən artır. Bu mənada mənə elə gəlir ki, daha yüksək yerlərə də oynamaq olar. 

- Təcrübəli futbol adamı kimi, çempionatımızın hazırkı səviyyəsini necə qiymətləndirərdiniz?

- Əvvəlki illərlə müqayisədə bu mövsüm maraq artıb. Həm ictimaiyyət tərəfindən, həm dövlət tərəfindən maraq, dəstək var. Buna görə də inkişaf var.

Anar XANLAROV