“Sumqayıt” Futbol Klubunun təşkilatçılığı ilə şəhərdə fəaliyyət göstərən idman cəmiyyətlərinin 2008-ci il təvəllüdlü futbolçulardan ibarət komandalarının iştirakı ilə “Zəfər Kuboku” turniri keçirilib.

Rekord.az xəbər verir ki, 8 komandanın mübarizə apardığı yarışın finalında “Ərgünəş” və “Məhəllə uşaqları” üz-üzə gəlib.

“Kapital Bank Arena”nın əsas meydançasında baş tutan həlledici qarşılaşmada “Ərgünəş” rəqibi üzərində qələbə qazanaraq turnirin qalibi olub.

“Zəfər Kuboku” turnirində iştirak edən bütün komandalara “Sumqayıt”ın hazırladığı xüsusi idman geyimləri və idman ləvazimatları, qalib kollektivə isə kubok təqdim edilib.

Mükafatlandırma mərasimində “Sumqayıt” FK-nın prezidenti Riad Rəfiyev, vitse-prezident Aydın Xəlilov, Müşahidə Şurasının sədri Abdulla Məmmədov, Müşahidə Şurasının üzvü Telman Salahov və AFFA-nın texniki direktoru Cahangir Həsənzadə iştirak edib.

Mükafatlandırmadan öncə “Sumqayıt”ın U-13 liqasının çempionu olan komandasına diplomlar təqdim olunub.

Bundan başqa, AFFA-nın keçirdiyi məktəbli kubokunda qalib olan 28 nömrəli tam orta məktəbin komandasına da diplom və medallar təqdim olunub.