Kristian Erikseni Milan “İnter”inə satan İngiltərənin “Tottenhem” klubu bu boşluğu doldurmaq üçün “Betis”dən icarəyə götürdüyü Covani Lo Çelsonu birdəfəlik transfer etməyə qərar verib.

Rekord.az xəbər verir ki, bu barədə London klubunun rəsmi saytı məlumat yayıb. 

Argentina millisinin üzvü İspaniya təmsilçisindən mövsümün sonuna kimi icarəyə götürülmüşdü. Lakin icarə müqaviləsində satınalma şərti də olduğundan, “Tottenhem” rəhbərliyi 23 yaşlı futbolçunun transfer hüquqlarını elə indidən almağa üstünlük veriblər. Britaniya mətbuatının yazdığına görə, Erikseni 20 milyon avroya satan londonlular, Lo Çelsoya görə “Betis”ə 32 milyon avro ödəyiblər. Argentinalı yarımmüdafiəçi “Tottenhem”lə 2024/25 mövsümünün sonuna kimi müqavilə imzalayıb.

“Betis”ə 2019-cu ilin yayında transfer olunan Lo Çelso daha öncə yetirməsi olduğu Argentinanın “Rosario Sentral” və Fransanın PSJ klublarında oynayıb.

Yeri gəlmişkən, “Tottenhem” Niderlandın PSV klubunun futbolçusu Steven Berqveyni də heyətinə qatmağa çox yaxındı. İngiltərə mətbuatının yaydığı xəbər görə, London klubu hollandiyalı vingerlə hərtərəfli razılığa gəlib. Razılığa əsasən, London klubu futbolçu üçün qarşı tərəfə 32 milyon avro ödəyəcək. Berqveynin tezliklə “Tottenhem”də tibbi müayinədən keçəcəyi və rəsmi müqaviləyə imza atacağı bildirilir.

22 yaşlı futbolçu cari mövsümdə PSV-nin heyətində iştirak etdiyi 29 oyunda 6 qol, 13 məhsuldar ötürmə ilə yadda qalıb.