Azərbaycan Futbol Federasiyaları Assosiasiyası, Azərbaycan Çimərlik Futbolu Federasiyası, Naxçıvan Muxtar Respublikası Gənclər və İdman Nazirliyi və Naxçıvan Futbol Federasiyasının birgə təşkilatçılığı, “Arazbet”in baş sponsorluğu ilə keçirilən çimərlik futbolu üzrə muxtar respublika çempionatında 1/4 final mərhələsinə yekun vurulub.

Rekord.az xəbər verir ki, reqlamentə əsasən çempionatın bu mərhələsində ilk olaraq “B” qrupunu lider kimi başa vuran “Şahinlər” komandası “D” qrupunun ikincisi “Antiinhisar” komandası ilə üz-üzə gəlib. Görüş “Şahinlər” komandasının qələbəsi ilə başa çatıb - 9:1.

Sonra “Panter” və “Prestij” komandaları qaşılaşıb. Gərgin keçən oyunda qələbə qazanan tərəf “Panter” komandası olub - 8:4.
Qrup mərhələsini lider kimi başa vuran “Badamlı” komandası ilə “C” qrupunun ikincisi “Hava Limanı” komandasının görüşündə qapılara 7 top vurulub. 4:3 hesablı qələbə qazanan “Badamlı” komandası növbəti mərhələyə yüksəlib.

Bu mərhələdə sonuncu görüş də keçirilib. Naxçıvan Dövlət Universitetinin komandası “Aralıq” komandası ilə üz-üzə gəlib. İlk iki hissəsi gərgin keçən görüşün taleyinə son 12 dəqiqədə aydınlıq gəlib. Belə ki, tələbələr oyunun gedişatında dönüş yaradaraq meydanı 4:2 hesablı qələbə ilə tərk ediblər.

Bu nəticələrdən sonra yarımfinala yüksələn komandalar məlum olub. Finala gedən yolda azarkeşlər “Şahinlər” - “Badamlı” və “Panter” – NDU oyununa şahidlik edəcəklər.