Voleybolçu qadınlardan ibarət Azərbaycan millisinin üzvü Kristina Besman Rusiya çempionatında növbəti oyununa çıxıb. "Rekord.az" xəbər verir ki, toppaylayıcımızın şərəfini qoruduğu "Tuliça" 25-ci turda Moskva "Dinamo"su ilə üz-üzə gəlib. 

Doğma meydanda baş tutuan qarşılaşma voleybolçumuzun komandası üçün uğursuz alınıb. Kristina və rəfiqələri 3 hissə davam edən matçda quru hesabla uduzublar - 0:3 (21:25, 15:25, 15:25).

Tula təmsilçisinin xalsız qaldığı görüşdə millimizin üzvü 2 dəfə fərqlənib. Besman xallardan birini blokda, digərini isə eyslə qazanıb.  

Qeyd edək ki, "Tuliça" 25 turdan sonra 53 xalla turnir cədvəlində 4-cü pillədə qərarlaşıb.